Duniaa

Iss rang badalti dunia mein, insaan ki haalat kya kehne,
Saccha chehra ab ek nahi, jhooth ke sab jaame pehne.

Ek hod lagi hai paise ki, jajjbat ka koi mol nahi,
Har ek dil mein kadwahat hai, mukh pe do meethe bol nahi,

Sab rishtey jhoothe lagte hain, ehsaas ka ab aadhar nahi,
Matlab ki dhooni jalti hai, ek duje ko aabhar nahi.

Vishwas ki bali-vedi par ab, dhokhe ka phool khilate hai,
Aage badhne ki dhun mein ab, imaan kharide jate hai.

Sacchai ki taakat ab, kisso mein sunai jati hai,
Bhrashtrachar ki dunia mein misaal banai jati hai.

Chandi ke chand sikkon ke liye, bhagwan ki boli lagti hai,
Sattha ka hai bazaar yahan, logon ki holi jalti hai.

Bhagwan bhi ab toh sochega, kaise ye uss se bhool hui,
Uski sabse adhbhut rachna, mitti mein mil kar dhool hui.

Thanks dear, ek muddat ke bad aaya hu...jee karta hai dil khol du.......

Aye kaash ki phir wo din aaye,Insaan ki keemat sab samjhen,
Bhautikta ka koi khel na ho, Imaan ki keemat sab samjhen,

Thanks Raj, aap bhi kuch likhte toh accha hota....

Phir wahi bat hai jiss par ki dil ye atka hai,
Hu pareshan yu hi dil bhi yu hi bhatka hai,
Hai haaalat hi kuch aise ab iss dunia ke,
Hum hi kya ye toh bhagwan ko bhi jhatka hai...

Thanks Pooja ji.............

Kya kahen ki ye rangmanch kaise palta hai,
Har ek shaksh yahan do chehre leke chalta hai,
Sach kehne aur sun.ne ka chalan beet gaya,
Har sach yahan jhooth ke sanche mein dhalta hai...

Thanks again pooja ji,

Jindagi ke har ek mod pe, humne thokar hi khayi hai,
Jhooth bhari iss dunia mein, sach ki ek shama jayali hai,
Dhekhe kab tak sahas hai mujhme, iss path par chalte rehne ka,
Aur nahi par itna hai, iss raste par bas tanhai hai....

Thanks a lot pooja...

Waise toh yahan har din, nayi mehfilein chalti hai,
Phir bhi har dil mein dekho, tanhai ki shama jalti hai,
Har shaksh yahan khush rehne ka, ek natak karta hai,
Sach toh lekin kuch aisa hai, dukh ki har dil mein basti hai.

Thanks a lot akela ji.........garmi mein aap almora ke maje le rahe hai, sahi hai.....i miss almora, ranikhet, bhowali, nainital and my dear SSGK