mutthiyon mein

Lambi beemari ke parache,

Jhhoti badnami ke Charache,

Failate sursa ke mukh se,

Din ba din badhate ye kharache .

Jhoot ke kitane mukhaute,

Sach mere man ko kachaute,

Kis ko doon main dosh bhi jab,

Hain mere sikke hi khote..

Dard ki badhati lehar se,

Kosati har ek nazar se,

Iss thahaakon ke shahar se,

Dar bahut lagata hai dar se.

Dukh ke din rone ki raatain,

Paas ke kamare ki baateain ,

Ab sahi jaati nahin hain,

Door se jaati baaraatain.

Haar ke ahsaas jaisaa,

Dolate Vishwaas jaisaa,

Ab to lagataa har dilaasaa,

Ek naye uphaas jaisaa.

Aansoo jo bahane na paaye,

Geet jo khul kar na gaaye,

Prashn jo pooche nahin the,

Baat jo ham kah na paaye .

Dhool se dhundale o bhure,

farsh par faile hain poore,

Chitr jo maine rache the,

An-ginat aadhe adhure.

Chindiyon main, chitthiyon main,

Aas ki anghitiyon main,

Swapn kuchh baaki bache hain,

Band meri mutthiyon main.