Mujhey tum yaad aatey ho
Kisi sunsaan sapney meiN chup hui khawahish ki hiddat meiN
Kisi masroofiyat key mod par
Tanhayi key sehraoN meiN
Ya phir kisi anjaan bemaari ki shiddat mein
Mujhey tum yaad aatey ho............

Kisi bichrey hue chashm-e-purnam key nazarey par
Kisi beetey hue din ki thakan ki aut sey
Ya phir tumharey zikr mein guzri hui shab key ishaarey par
Kisi basti ki ba-ronak sadak par
Aur kisi daryaa, kisi weeraan jungle key kinaarey par
Mujhey tum yaad aatey ho...........

Meri chup key koein meiN
Arzuoon key badan jab tairtey hain
Aur kinaarey sey koi boley
Tu lagta hai ajal awaaz deti hai
Meri bey-chainiyon mein jab tumhari tund-khu ranjhish khatakti hai
Tumhari bey-sabab doori sulagti hai
Ya phir jab bhi meri aankhon key sehra mein
Tumhari yaad ki tasveer jalti hai
Judayi haath malti hai
Mujhey tum yaad aatey ho................

Muqaddar key sitaaroN par
ZamanoN key ishaaroN par
Udaasi key kinaaroN par
Kabhi weeraaN shehroN meiN
Kabhi sunsaan raastoN par
Kabhi hairaaN aankhoN meiN
Kabhi bey-jaan lamhoN par
Mujhey tum yaad aatey ho.............

Suhaani shaam ho koi
KahiN badnaam ho koi
Bhaley gulfaam ho koi
Kisi key naam ho koi
Mujhey tum yaad aatey ho..............

KahiN baarish baras jaye
Kahin sehra taras jaye
KahiN kaali ghaTa utrey
Kahin baad-e-saba thehrey
Tumharey aur merey darmeyaaN aa kar Khudah thehrey
to meri zindagi key awaal-o-aakhir
Tum us lamhey
Khudah key baad aatey ho
Mujhey tum yaad aatey ho..............(nm)


Aapki......................Aarzuu..................