Urdu Talaffuz Aasan

[Prateek Mardia]

syeednaami ji,

bohut kamaal ka aapne thread shuru kiya he.urdu par aapki pakad vakai gazab he.shayad kuch alfaaz hum seekh sake aur yaad rakh sake.shukriya bohut bohut.

Regards
Prateek

[syednaami]

Aap ki zaraNawaazi ka tah-e-dil se mashkoor hun.
DarAsal iss thread men main un Alfaaz ke talafuzz ki tasheeh karta hun jo umooman ghalat likhe ya padhe jaate hain, jiss ki wajah se unka asal talaffuz kho rahe hain.
Aap ki nazr-e-karam rahni chahiye.

S Naami

[syednaami]

Aaj ka lafz (Word)

Ghazab (Keher, Bapta, Fury, Disaster)
Urdu main "Ghazab" ka saheeh talaffuz "Gha-zab" hai.
((There is a slight difference between G and Gh vocals, Gh sound comes straight from the throat while G sound comes from middle of the tongue.))
Aksar "Gajjab, Gazab" waghairah likha ya bola jataa hai, jo ki Urdu zabaan men saheeh nahin hai.

Mazeed Alfaaz ke saheeh aur aasan talaffuz ke liye intizaar farmayen.

Mamnoon-wa-Mashkoor

Khaadim

(S Naami)

[Prateek Mardia]

syeednaami ji,

shukriya ghazab ki spelling mein ab falti nahi hogi.
par yeh bataaye-aapne jo arth likhe he(keher,bapta,fury,disaster)
sub adhiktar negative baat kehne ke liye istmaal kiye jaate he. kya iska mutlub ghazab kuch ''accha'' kehne ke liye istmaal nahi hona chaiye?

ek aur maargdarshan kare
'faqat' ka sahi arth kya he--apni ek kavita mein is shabd ka priyog kiya he,aur shirshak mein bhee,durta hu shaayad galat he.
spelling fakat likhi he-jo samjh chuka hu faqat honi chaiye pur arth bhee exact bataane ki kripa kare.
maine jo shirshak diya he woh he--'yeh faqat kaisa ulaahna' jisme mein faqat ka arth kehna chah raha hu--yeh'bhala'kaisa ulaahna.shaayad galat lagta he.
roshni ki intzaar mein,
aapka
Prateek

[syednaami]

Aaj ka lafz (Word)

Majaaz (Imagination, Unreal, Tasavuraati, Avaastav, Path)
Urdu main "Majaaz" ka saheeh talaffuz "Ma-jaaz" hai.
Aksar "Majaaj, Mazaaj" waghairah likha ya bola jataa hai, jo ki Urdu zabaan men saheeh nahin hai. Aksar Majaaz ko Mizaaj bhi samjha jaata hai, aisa ghalat hai. Dono alfaaz ka matlab alag alag hai.

Mazeed Alfaaz ke saheeh aur aasan talaffuz ke liye intizaar farmayen.

Mamnoon-wa-Mashkoor

Khaadim

(S Naami)

[Prateek Mardia]

syeednaami janaab,

kuch roshni daal dijiye meri khalish par..neend aa jayegi.

Prateek

[syednaami]

syeednaami ji,

shukriya ghazab ki spelling mein ab falti nahi hogi.
par yeh bataaye-aapne jo arth likhe he(keher,bapta,fury,disaster)
sub adhiktar negative baat kehne ke liye istmaal kiye jaate he. kya iska mutlub ghazab kuch ''accha'' kehne ke liye istmaal nahi hona chaiye?

ek aur maargdarshan kare
'faqat' ka sahi arth kya he--apni ek kavita mein is shabd ka priyog kiya he,aur shirshak mein bhee,durta hu shaayad galat he.
spelling fakat likhi he-jo samjh chuka hu faqat honi chaiye pur arth bhee exact bataane ki kripa kare.
maine jo shirshak diya he woh he--'yeh faqat kaisa ulaahna' jisme mein faqat ka arth kehna chah raha hu--yeh'bhala'kaisa ulaahna.shaayad galat lagta he.
roshni ki intzaar mein,
aapka
Prateek

(1) Aap ne baja farmaaya "Ghazab" ka ista'amaal musbat (positive) aur manfi(negative) dono tarah ke bol chaal men hota hai.
(Maslan: Kya ghazab ho gaya!(manfi ista'amaal hai), Ghazab ka Shayar hai (yahaan masbat matlab hai).
Magar iss thread men mera zor talaffuz (Spelling and correct pronunciation par hai. Ma'ani (meaing) par dhiyaan ziyaada nahin diya.)
Aap ne jo tasheeh ki hai woh bhi buhat ahim kadi hai, main ayindah iss ko mad-e-nazar rakhunga.

(2) Faqat (Only, keval, sirf, mahiz): faqat ka saheeh ho murravijah matlab wohi hai jo "fakat" ka hindi men hai.
Urdu main do tarah ke "Ka" harf hote hain, dono ko (Kaaf aur Qaaf) padha jaata hai, kuchh alfaaz men kaaf ista'amaal hota hai, to kuchh main Qaaf, yeh sirf Urdu likhne ki mashq karne se ma'aloom hoga.
Jahaan 'Qaaf' ista'amaal hota hai, to main usse Roman letter Q se wazah kia jaata hai. Jaise, Haqeeqat  main 'Qaaf' do dafa hai.

Mujhe umeed hai ki aap ko iss chhoti si vazaahat se andaaza ho jaayega.
Agar kahin ghalti ho to ma'azarat chaahata hun.

Tashakkur ke saath

S Naami

[Celmira]

Please keep going, its a brilliant thread.....jaise aapne lafz sahi bataye hain, is tarah ki ghaltiyan yahan bohot log apni poetry main karte hain...I just hope they are keeping track of this thread.

[syednaami]

Umeedon ke dam par Qaaim mehfil-e-duniya hai
Khuda isse hamesha aabad rakhe yehi dua hai.

Shukriya Celmira Saahiba,
        Meri koshish jaari-o-saari hai, dost bhi saath khoob nibha rahe hain, mujhe khud yaqeen nahin aaraha ki yeh karvaan kis tarah badh raha hai.

Buhat Shukriya

[syednaami]

Aaj ka lafz (Word)

Maza (Fun, Taste, Swad, joy, Khushi)
Urdu main "Maza" ka saheeh talaffuz "Ma-zaa" hai.
Aksar "Maja" likha ya bola jataa hai, jo ki Urdu zabaan men saheeh nahin hai.

Mazeed Alfaaz ke saheeh aur aasan talaffuz ke liye intizaar farmayen.

Mamnoon-wa-Mashkoor

Khaadim

(S Naami)

[Prateek Mardia]

syeednaami ji,

ravivaar ko aapne avkaash rakha hein school mein..fir hum kyon uniform pehan ke beth gaye the?

Prateek

[syednaami]

Prateek Mian,
Humne aap ki raah taki thi, magar aap ko na paya.
Waisi ek din agar school ki aam ta'ateel ho to kya muzaaiqa hai.
Aapke qadam aavari ka shukriya.

S Naami

[syednaami]

Aaj ka lafz (Word)

Ijaazat (Permission, chhuti lena, Anumati)
Urdu main "Ijaazat" ka saheeh talaffuz "I-Jaa-zat" hai.
Aksar "Izaazat ya Ejaajat" waghairah likha ya bola jataa hai, jo ki Urdu zabaan men saheeh nahin hai.

Mazeed Alfaaz ke saheeh aur aasan talaffuz ke liye intizaar farmayen.

Mamnoon-wa-Mashkoor

Khaadim

(S Naami)

[Sayyid Randeri]

Lafz "Ijaazat" ke baad koi "harkat" nahi huai is thread me, shayad s.naami sahab ne khatm karne ki "ijaazat" chahi thi? koi btaega kya ye jaari rahega ya sab ko milgai "Sanad-e-Fraagat".

[syednaami]

Aaj ka lafz (Word)

Tarz (Namoona, Andaaz, Dhang, Tareeqa, Like, Tarah, Nirbhaas)
Urdu main "Tarz" ka saheeh talaffuz "Tar-z" hai.
Aksar "Tarj, Tirz ya Tirj " waghairah likha ya bola jataa hai, jo ki Urdu zabaan men saheeh nahin hai.

Kuchh saahib-e-zubaan "TARZ" ko "TIRZ" padhte hain, par asal men "TARZ" saheeh lafz hai.

Usage Sentence :: Rajesh ka ghar American Bungalow ke Tarz par banaaya gaya hai.

Mazeed Alfaaz ke saheeh aur aasan talaffuz ke liye intizaar farmayen.

Mamnoon-wa-Mashkoor

Khaadim

(Syed Naami)

	Enter your search terms
	Web Yoindia.com Submit search form

[Latest More Games]

Latest More Games

Agumaze	AeroPlane
Speedy Thief	Speed Racer