ને સાચ્ચો જવાબ દઈશ તું?

ને સાચ્ચો જવાબ દઈશ તું?
તને વ્હાલો વરસાદ કે હું?

તને વરસાદી વાદળના વાવડ ગમે
કે મારા આ મળવાના વાયદા
તને મારામાં ખુલવું ને ખીલવું ગમે
કે છત્રીના પાળવાના કાયદા..

તને વરસાદી વાદળનું ચૂમવું ગમે
કે તરસી આ આંખોનું ઝૂરવું
હું ને આ વાદળ બે ઊભા જો હોઈએ
તો, કોનામાં દિલ તારે મુકવું

તને છોને વરસાદ હોઈ વ્હાલો પણ,
કોણ તને લાગે છે વ્હાલું વરસાદમાં
તને આટલું ચોમાસું વ્હાલું જો હોય
તો આંખો ભીંજાય કોની યાદમાં..