મથું છું....

 
    ક્યાંક થી આવી ગઈ ભીની હવા
    શ્વાસ પણ છાતીમાં લાગ્યા ખુચવા

    સાદ પાડે છે સ્વયં સદીઓ મને
    નીકળ્યો છું હું ક્ષણોને શોધવા

    ઝંખનાને આંખ કે પાંખો નથી
    આભને લાગી છે તોયે આંબવા

    આ તમારા મૌનને હું શું કહું
    રંગ દેખાડે મને એ અવનવા

    શ્વાસ થી સંબંધ સચવાયો નહિ
    ક્યાં હવે સંબંધ બીજા બાંધવા

    હર ક્ષણે તોળ્યા કરે છે એ મને
    આ તમારી આંખ છે કે ત્રાજવાં

    શૂન્યતા જે કોઈ વિસ્તરી ગયું
    શબ્દમાં એને મથું છું માપવા