ਰੇਤਾ ਉੱਤੇ ਲਿਖਿਆ ਨਾਂ - Kaka Gill

ਰੇਤਾ ਉੱਤੇ ਲਿਖਿਆ ਨਾਂ
ਕਾਕਾ ਗਿੱਲ

ਤੁਸੀਂ ਤਾਂ ਸਵਾਲ ਪਾ ਰਹੇ ਹੋ
ਰੇਤਾ ਉੱਤੇ ਲਿਖਿਆ
ਮੇਰਾ ਨਾਂ ਮਿਟਾ ਰਹੇ ਹੋ

ਕਿੰਨਾਂ ਕੁ ਚਿਰ ਮੈਂ ਸਹਿ ਸਕਾਂਗਾ?
ਕਿੰਨੀ ਦੇਰ ਮੈਂ ਜਿਉਂਦਾ ਰਹਾਂਗਾ?
ਇਸ ਸਿਤਮ ਦਾ ਭਾਰ ਮੋਢਿਆਂ ਤੇ ਚੁੱਕਕੇ
ਮੈਂ ਛੇਤੀ ਛੇਤੀ ਥੱਕ ਜਾਵਾਂਗਾ
ਤੁਸੀਂ ਵਿਛੋੜੇ ਦੀ ਠੰਢ ਵਰਾਕੇ
ਮੇਰਾ ਹੌਂਸਲਾ ਢਾ ਰਹੇ ਹੋ

ਰੇਤਾ ਉੱਤੇ ਲਿਖਿਆ
ਮੇਰਾ ਨਾਂ ਮਿਟਾ ਰਹੇ ਹੋ

ਇਹ ਉੱਡਣ ਹਾਰੋਂ ਗਿਆ ਬਿਰਹੋਂ ਦਾ ਜਹਾਜ਼
ਵਾਜਾਂ ਮਾਰਨ ਤੋਂ ਖੋਖਲੀ ਅਵਾਜ
ਗੰਢੇ ਦੀ ਕੁੜੱਤਣ ਦੇ ਹੰਝੂ
ਬਣਾਉਂਦੇ ਲੁਟੇਰੀ ਤੋਂ ਸਤੀ ਲਾਜਵਾਬ
ਜਿਉਂਦਾ ਰੱਖਣ ਨੂੰ
ਪਾਣੀ ਪਿਆ ਰਹੇ ਹੋ

ਰੇਤਾ ਉੱਤੇ ਲਿਖਿਆ
ਮੇਰਾ ਨਾਂ ਮਿਟਾ ਰਹੇ ਹੋ

ਗਲ਼ ਘੁੱਟਵੇਂ ਬੇਰ ਦੀ ਗਿੜ੍ਹਕ ਗਲ਼ ਫਸੀ
ਖੱਟੀਆਂ ਅੰਬੀਆਂ ਦੀ ਖਟਿਆਈ ਦਿਲੇ ਵੱਸੀ
ਸੜਦੇ ਲੋਹੜੀ ਵਿੱਚ ਤਿਲ਼ਾਂ ਦਾ ਰੌਲਾ
ਸੁਣਕੇ ਰੂਹ ਆਪਣੇ ਧੁਖਣੇ ਉੱਤੇ ਹੱਸੀ
ਛੇੜਾਂ ਛੇੜ ਕੇ ਮੇਰੇ ਦਿਲ ਨਾਲ
ਤੁਸੀਂ ਖੇਡਾਂ ਖਿਡਾ ਰਹੇ ਹੋ

ਰੇਤਾ ਉੱਤੇ ਲਿਖਿਆ
ਮੇਰਾ ਨਾਂ ਮਿਟਾ ਰਹੇ ਹੋ

ਪਿਛੋਕੜ ਦੀਆਂ ਗੱਲਾਂ ਯਾਦ ਕਰਕੇ
ਮੂੰਹ ਹੱਸਦਾ ਫਿਰ ਰੋਂਦਾ ਤੈਂਨੂੰ ਯਾਦ ਕਰਕੇ
ਗੁਜਰੇ ਹੋਏ ਜਮਾਨੇ ਨੂੰ ਫੂਕ ਕੇ
ਮੈਂ ਆਉਣ ਵਾਲੇ ਕੱਲ ਵਿੱਚ ਮਰਕੇ
ਜੁਆਬ ਤੇਰੇ ਸਵਾਲ ਦਾ
ਪੱਥਰ ਵਿੱਚ ਲਿਖ ਦਿਆਂਗਾ ਉੱਕਰਕੇ

ਤੁਸੀਂ ਇਸ ਜੁਆਬ ਨੂੰ ਮਾੜਾ ਸਮਝਕੇ
ਦੂਸਰੇ ਜੁਆਬ ਲਈ ਸਤਾ ਰਹੇ ਹੋ

ਮਰਨ ਦੇ ਕੰਢੇ ਹੋਈ ਜਿੰਦਗੀ ਦੀ
ਪਿਆਰਕੇ ਉਮਰ ਵਧਾ ਰਹੇ ਹੋ

ਰੇਤਾ ਉੱਤੇ ਲਿਖਿਆ
ਮੇਰਾ ਨਾਂ ਮਿਟਾ ਰਹੇ ਹੋ