Dil ne ye dard ka pehloo kabhi jaanaa he na thaa
Tu kisi aur ki ho gi, kabhi maanaa he na thaa
Sochtaa hoon teray dil ki haseen duniyaa ko
Ab koi aur bhalaa kaisay samajh sakta hay
Gham-e-hayaat aur ye talkh haqaaiq ki zubaan
Ab bhalaa kon zamaanay main sunaa karta hay
Ye haseen aariz-o-gesoo ye nigaahon ki hayaa
Jaanay kis haath main ubhray hain lakeeren ban kar
Jaanay kis shakhs kay khush-bakht baazuon kay hasaar
Kharay hain raah-e-mohabbat main faseelen ban kar
Aye meri jaan ye yaaqoot taraashay huvay lub
Kay jin pay dil ko yaqeen tha kay faqat meray hain
Wo sarzameen jahaan khushbuon kay pehray thay
Ab us pay kargison kay bheriyon kay deray hain
Dakhe, kya rang hain taqdeer kay is duniya main
Main bhe baazaar main har roze bikaa kartaa hoon
Noche letaa hay meri raat ko qismat ka junoon
Tassavuraat ki baanhon main chhupaa rehtaa hoon
Magar aye jaan say pyaari meri jaanaan ye bataa
Yun kab talak hum apnay dil main zakham paalen gay?
Hum apnay jism tu duniyaan main haar bethay hain
Kya apni rooh bhe duniyaan main bech daalen gay?
Sochtaa hoon teray wajood kay haseen paikar
Meray nahi tu kisi aur kay bhe ku aakhir?
Mera lahoo, meri baanhon kay sahaaray, ye wafa
Teray nahi tu kisi aur kay bhe ku aakhir?
Teray labon pay mera haq tu nahi hay lakin
Teri zubaan kay fasaanay tu samajh saktaa hoon
Meray nahi teray jalvay, magar tassavur men
Main in ko apnay khazaanay tu samajh sakhta hoon
*---------------------------*
Good One ..... Vb Ji !
dil se daad ... !!!