Jhooth ko sahare,samarthan ki darkaar hoti Satya ko nahi

Raam,Krishna,Budhh,Mahaveer,Jesus,Mohammad,Nanak,Kabir,Soordaas,Tulsidaas,Meerabai,Vajid,Raidaas,Raheem,Raskhan,Sahjobai,Samarathguru Ramdaas,Tukaraam,Eknath,Sant Gyaaneshwar,Paltudaas,Rabia,Ibrahim,Harun,Naamdev,Swami Ramkrishna,Osho,Swami Raamsukhdaas ityaadi ye jo bhi eeshwar ke avtaar,uske paigambar w uske bhakt aadi the ye satya ko uplabdh the athaarth satya ko praapt chetnaayen the. In sabhi ke jiwan me ek baat samaan thi ki  kasht sahte hue bhi inhone satya ko thaame rakha. Satya ek ujaala hai jiski gawaahi ujaalapan hai aur jhooth hazaar jhooth ka samarthan hasil kar le satya nahi ho sakta. Poori prithwi ka andhera suraj ki maatra pehli kiran se door ho jata hai. In chetnaon ke dwaara swayam parmaatma ye udghosh karta raha ki anand satya me hai aur satya shunyata me hai. Shunyata hamare maansik wa adhyaatmik tal ka kendrabindu hai. Parantu hum in chetnaon se ye bhi nahi seekh paate ki Satya ki yaatra me bhale dukh bhi hon vaastavik anand Satya athart parmaatm praapti me hai.Bhakt ke lie kasht awsar hain jinse wo aur ubharta hai aur nikharta hai uski eeshwar bhakti pragaadhtar hoti hai.Jab tak ham 'sansaar me sukh hai' is manorog wa mithyadhaarna me rahenge tab tak swayam ke kendra ki oor unmukh nahi ho sakte.