kaun bataye??

kyoN ham se hu'e aap Khafaa, kaun bataa'ye?
aaKhir hu'ee kyaa aisee Khataa, kaun bataa'ye?

begaana-e-hastee hooN main gum-kardah-e-manzil
bhatke hu'e raahee ko pataa kaun bataa'ye?

tum ko hai gilaa ham se to dunyaa ko shikaayat
kyaa Khoob chalee hai yeh hawaa, kaun bataa'ye!

yeh raah-e-muhabbat ko'ee aasaan naheeN hai
jo shaKhs hai so aabla.paa! kaun bataa'ye!

andoh-e-vafaa, zaKhm-e-alam, Khoon-e-tamannaa
rutbah yeh hamen kaise milaa, kaun bataa'ye?

voh teraa bharee bazm meiN andaaz-e-taghaaful
uss neem.nigaahee kaa mazaa kaun bataa'ye?

kyaa ham pe guzartee hai sar-e-dasht-e-tamannaa
tum ko naheeN itnaa bhee pataa, kaun bataa'ye?

hum ko muhabbat mein Ghazal ko'ee naheen yaad
bhooley hu'e ik arsah hu'aa, kaun bataa'ye!