zarraa .... mujh ko koyee chhupa le

mujh ko koyee chhupa le raanaaiyoN* meiN apni
maiN kho kaheeN n jaaooN in wus'atoN* meiN apni

naakaamiyaaN likheeN haiN sab sooratoN meiN apni
ruswaaiyaaN* nihaaN* haiN har hasratoN meiN apni

jo aaj shakhsiyat hai majbooriyoN meiN apni
ik daur tha ke ginti thi sarkashoN* meiN apni

saaree haqeeqateiN ye kaalee safed si haiN
kuchh wahm kar do paida raNgeeniyoN meiN apni

maana n jaavedaaN* haiN mausam mahabbatoN ke
tum ne zamaane* badle do karwatoN meiN apni

keemat chukaayee in ki maana qadam qadam pe
nuksaan par n dekho achchhaiyoN meiN apni

hasti thi tinke jaisi ye hi hua sahaara
warna maiN doobta tha gehraaiyoN meiN apni

har roz hota maatam chaaragharoN* meiN apna
har shaam yaad taaza baadakashoN* meiN apni

dekha sabhi ne lekin koyee n paas aaya
tanhaaiyaaN dabeeN theeN ooNchaaiyoN meiN apni
 
bedaariyoN* meiN "zarraa" aashaar* ko jagaate
kya chain dhooNdhte ho bechainiyoN meiN apni


- zarraa

*
raanaaiyoN = beauty / grace
wus'atoN = expanse / wide spaces
ruswaaiyaaN = disgraces
nihaaN = concealed
sarkashoN = rebel / arrogant
jaavedaaN = eternal
zamaane = eras
chaaragharoN = healer / doctor
baadakashoN = drunkards / alcoholics
bedaariyoN = states of sleeplessness
aashaar = couplets