Pakandi baba & sarse wala ,nirmal baba -Jash Panchi

ਲੱਖਾਂ ਵੱਟੇ ਰਾਖ ਦੀ ਚੁਟਕੀ ਬਾਬੇ ਵੇਚੀ ਜਾਂਦੇ ਨੇ।
ਬਾਲ ਕੇ ਅੱਗ ਹਨੇਰੀ ਦੀ ਬਈ ਹੱਥ ਸੇੱਕੀ ਜਾਂਦੇ ਨੇ।
ਕੰਨ ਵਿੱਚ ਫੂਕਾਂ ਮਾਰ ਭੇਡਾਂ ਨੂੰ ਚੇਲੇ ਬਣਾਈ ਜਾਂਦੇ ਨੇ।
ਖੋਲ੍ਹ ਕੇ ਡੇਰੇ ਸਾਧ ਪਖੰਡੀ ਪੈਸੇ ਕਮਾਈ ਜਾਂਦੇ ਨੇ।

ਬ੍ਰੈਂਡੇਡ ਕੱਪੜੇ ਤੇ ਮਹਿੰਗੀਆਂ ਕਾਰਾਂ ਲੈਂਦੇ ਫੁੱਲ ਨਜ਼ਾਰੇ।
ਕਰਨਾ ਜੀ ਪ੍ਰਚਾਰ ਸਿੱਖੀ ਦਾ ਬਾਬੇ ਕਹਿੰਦੇ ਸਾਰੇ।
ਵੋਟਾਂ ਖਾਤਰ ਬੈਗਰਤ ਲੀਡਰ ਜੋ ਇਨ੍ਹਾਂ ਨਾਲ ਹੱਥ ਮਿਲਾਈ ਜਾਂਦੇ ਨੇ।
ਖੋਲ ਕੇ ਡੇਰੇ ਸਾਧ ਪਖੰਡੀ ਪੈਸੇ ਕਮਾਈ ਜਾਂਦੇ ਨੇ।

ਅੱਖੋਂ ਦੇਖ ਕੇ ਵੀ ਦੁੱਧ ਵਿੱਚ ਮੱਖੀ ਲੋਕੀਂ ਖਾਈ ਜਾਂਦੇ ਨੇ।
ਸੋਨਾ ਚਾਂਦੀ ਬਾਬੇ ਦੀ ਝੋਲੀ ਵਿੱਚ ਪਾਈ ਜਾਂਦੇ ਨੇ।
ਵਿਕ ਗਿਆ ਮੀਡੀਆ ਹਿੰਦੁਸਤਾਨੀ, ਝੂਠਿਆਂ ਨੂੰ ਵਡਿਆਈ ਜਾਂਦੇ ਨੇ।
ਖੋਲ੍ਹ ਕੇ ਡੇਰੇ ਸਾਧ ਪਖੰਡੀ ਪੈਸੇ ਕਮਾਈ ਜਾਂਦੇ।

ਗੁਰੂਆਂ ਦਾ ਇਤਿਹਾਸ ਸੁਣਾਉਣ ਦੀ ਬਜਾਏ,
ਮਰਿਆਂ ਦੀਆਂ ਸਾਖੀਆਂ ਸੁਣਾਉਂਦੇ ਫਿਰਦੇ।
ਗੁਰਬਾਣੀ ਦੀ ਕੋਈ ਤੱਤ ਵਿਚਾਰ ਨਹੀਂ ਕਰਦੇ,
ਧਾਰਨਾਵਾਂ ਦੀ ਰੇਲ ਬਣਾਉਂਦੇ ਫਿਰਦੇ।
ਭੋਲੇ ਭਾਲੇ ਲੋਕਾਂ ਨੂੰ ਵਹਿਮਾਂ-ਭਰਮਾਂ ਚ ਪਾਈ ਜਾਂਦੇ ਨੇ।
ਖੋਲ੍ਹ ਕੇ ਡੇਰੇ ਸਾਧ ਪਖੰਡੀ ਪੈਸੇ ਕਮਾਈ ਜਾਂਦੇ ਨੇ।

ਵੈਰੀ ਬਣ ਗਈ ਦੁਨੀਆ ਖਨੋਰੀ ਵਾਲੇ ਦੀ,
ਬਈ ਜਦੋਂ ਤੋਂ ਸੱਚ ਬੋਲਣ ਲੱਗਿਆਂ।
ਲੋਕਾਂ ਦੇ ਵਿੱਚ ਪੋਲ ਇਨ੍ਹਾਂ ਪਖੰਡੀਆਂ ਦੀਆਂ ਖੋਲ੍ਹਣ ਲੱਗਿਆਂ।
ਚੱਕ ਦਿਆਂਗੇ ਤੈਨੂੰ "ਪੰਛੀ" ਚੇਲੇ ਡਰਾਈ ਜਾਂਦੇ ਨੇ।
ਖੋਲ੍ਹ ਕੇ ਡੇਰੇ ਸਾਧ ਪਾਖੰਡੀ ਪੈਸੇ ਕਮਾਈ ਜਾਂਦੇ ਨੇ।