ghazal: Darya-e-Sindh

Aaatishi aahoon se meri jal utha darya-e-sindh
Ishq ke sehra main mere kho gaya darya-e-Sindh

Sedha sedha aa raha tha per mere mehboob ki
Zulf ke bal dekh ker bal kha gaya darya-e-Sindh

Sabza-e-khat sa numayaan shehr-e-sukker ho gaya
Aur lab-e-mehboob ban ker khil utha darya-e-Sindh

Wadi-e-Tibbet ke mathe se faware ki tarah
Aye Khuda yunhi sada behta rahe darya-e-Sindh

In paharoon se uter ker wadi-e-mehran se
Ho ke ik aashiq dewana mil gaya darya-e-Sindh

Jur gaye ravi chanab-o-satluj-o-jehlum biyas
Soye manzil in ko phir le ker chala darya-e-Sindh

Gulshan-e-Multan tujh ko naaz he is per baja
Hamsafer kuch der tak tera raha darya-e-Sindh

Raat bher sunte rahe mojoon ki ham sargooshiyan
Ek anjaani katha kehta raha darya-e-sindh

Qudrat-e-haq ki alamat he arab sagar ager
Hai koi sadyoon purana devta darya-e-Sindh