NazroN ko churaate ho aise

NazroN ko churaate ho aise jaise mujh se anjaan ho tum.
Kya ye hi mohabbat ka hai sila jaane kaise insaan ho tum.

Kya cheez mohabbat hoti hai kis ko kehte haiN log wafaa,
Kya dard-e-judaai hota hai kya tum ko khabar naa daan ho tum.

HaiN dil ko hazaaroN dard magar tumheN dekh ke sab mit jaate haiN,
Har dard ki tum hi davaa ho sanam har dukh ka mere darmaan ho tum.

Chaaha hai tumheN maiN ne kitna ye kehna mushkil hai lekin,
Jis dil ko koi armaan nahiN hai us dil ka armaan ho tum.

YoN to the base is dil meN sadaa dhaRkan ki tarah ai jaan-e-wafaa,
Lekin barsoN ke baad kahiN ab jaa ke huye mehmaan ho tum.

NahiN tum se koii gila mujh ko bas itna poochhna chaahoNga,
Tum bin maiN jiyoN to kaise jiyoN maiN jism hoN meri jaan ho tum.

Jab kisi ko kisi se mohabbat ho aur mahboob uski mohabbat ki qadr na kare to dil ko takleef, hoti hai, dil shikaayat karta hai, lekin apne mahboob ko naaraaz bhi nahiN karna chaahta.
Isi khayaal ko lekar main ne ye ghazal likhi hai, jis meN shikaayat bhi, izhaare mohabbat bhi hai, dard-e-dil bhi hai....
pasand karne ke liye shukriya..
     "Haider"