Tzaad

Tzaad





YaadoN kay bawandar say uth rahay haiN takhu_ul ki sarzmiN pe

Barq ban kay chamkta hai teri afsurda haNsi ka chehra

Honay lagi hai teray naaz-o-karam ki rimjhim
Meri takhleeq main wo pehlee barsaat ki saundhi mehak aa rahi hai



Tanha bahut tanha hai dil teray jaanay kay baad

SaMbhla nahi wajood shorisoN main bhi doob jaanay kay baad

Zamaana to samjhta hai isay shauq-e-fitoor mera

Har cheray main agar duNdta huiN teri hi parchaaiaN

Aur uqta kay uth aataa huiN phir apnay khyaaloN ki duniya main

Siyaah aur siyaah ho jaati hai phir mari tanhaaian



Ab tu bani hai kisi gai_r ki zindgi ka unwaaN

Ab teri raataiN uskee baahon main basi rahti haiN
Ab na us ulfat ki haqeeqat baqi

Phir bhi nadaan umeed dil main basi rahti hai



Poochta huin main aksar apni talkh raaton say

Ki kya hai aqaayud-e-mahabbat ki asaas?

Kya hai yeh rasoomaat maiN lipta ik shauq-bekaar?

Kya haiyeh ishq kay naam pay paltay huay pajmurda ahsaas?


Kya hai yeh mahabbat,yeh mahabbat ki tashheer

Kadam dar kadam samjautaoN ki besood ta_ameer

Kya hai yeh jism-o-rooh kay alag alag mayaar

Kya hai parastish pay palta yeh phalsafa-e-taqdeer?



Thahar ab zauq-etalab thahar

Aaj na yeh baat uthaa

Aaj ki raat barasta hai gujishta mahabbat ka jaadu

Aaj ki raat kuch na keh kuch na suna
---------------------------------------------------------

                         --- Brijinder “Sagar”

                              Auckland, New Zealand

Meaning;

Tzaad: Takraav

Takhu_ul; Kalpana(imagination) Barq: Bijli

Afsurda: Udaas Takhleeq: Rachna

ShorishoN: Kolahul (noise) Shauq-I-fitoor: Pagalpan ka shauq

Aqaaud-I-mahabat: Prem kay prati vishwaas Asaas: Neev(foundation)

Rasoomaat: RasmaiN Pajmurda : Admaray(half dead)

Tasheer: Vigyaapan(advertisment) Bessod: vyarth (useless)

Ta_ameer: Nirmaan( construction) Gujishta: Beeta hua kal(past)