Din chhupa aur gham k saye dhaly,QABIL AJMERI

Din chhupa aur gham k saye dhaly,
Arzu k naye charagh jalay,

Barh gaya aur gham judai ka,
Ap se mil k hum ne haath malay,

Kaya kahen laghzishen huin kitni,
Jb kbhi hum zara sanbhal k chalay,

Hum badltey hain rukh hawaon ka,
Aaye dunya hamary sath chalay,

Soz-e parwana mukhtasir ha bohat,
Jis ko jalna ha shama bn k jalay,

Gham k sholy liptt hi jatay hain,
Koi dunya se lakh bach k chalay,

Lab pe hichki ha aur tabassum bhi,
Jany hum kis se mil rahy hain galay,

Dil k un hoslon ka haal na poochh,
Jo tery daaman-e karm main palay,

Maslehat sar'nigon khird khamosh,
Ishq k aagy kis ki daal galay,

Jan o dil nazr-e ishq hain QABIL,
Ye musibat kisi tarah to talay.

QABIL AJMERI