Mohabat dastaa'n ho jaye gi kaya? QABIL AJMERI

Mohabat dastaa'n ho jaye gi kaya?
Khalish barh kar fughaa'n ho jaye gi kaya?

Mubaarak ishrat-e didaar lekin
Hawis bhi shadmaa'n ho jaye gi kaya?

Sitaary maand parrty hi nahin aaj.
Shab-e gham jawidaa'n ho jaye gi kaya?

Nahin ab tere milny ka gumaa'n bhi
Qayamat na'gahaa'n ho jaye gi kaya?

Nigaah-e yar barham hoty hoty
Mizaaj-e gulistaa'n ho jaye gi kaya?

Mita jaata ha dil raah-e talab main
Tamana be'karaa'n ho jaye gi kaya?

Musaafir gum sahi taarikiyun main
Sehr bhi be'nishaa'n ho jaye gi kaya?

Chhalakta hi nahin pemaana koi
Bahaar ab k khizaa'n ho jaye gi kaya?

Urra jaata ha QABIL zar'ra zar'ra
Zamee'n bhi aasmaa'n ho jaye gi kaya?

QABIL AJMERI