PAISA FAIKH TAMASHA DEKH - Hell Of Money (2012 classic crime thriller story)

Chapter 1 :-



​Train ki tezz raftaar se nikalti ye zindagi meri apni haalat se bilkul mel khaati thi. Ek taraf main tha aur meri majbooriyaan, toh doosri taraf mere ghar ki girti haalat. Train ke har platform par jab aap ajnabiyon aur nayi jagahon ko dekhte hain, thik waise hi main aaj apni zindagi se rubaru hone wala tha. Paanse ki tarah meri kismat palatne wali thi.
​Mera naam Asif Hussain hai. Main 12th pass tha. Darasal, mere abbu hamesha mujhse kaha karte the ki imaandaari ke raaste par chalna. Unhone khud kabhi imaandaari ka raasta nahi chhoda. Lekin badle mein unhein kya mila? Do waqt ki roti, ek chhat aur dher saari aarthik musibatein.

​Paisa... Mujhe paise se sakht nafrat thi. Mere abbu ki jaan lene wala koi aur nahi, ye paisa hi tha. Jab kangali ne unhein majboor kar diya, toh woh meri maa ke naam ek khat likhkar, gale mein rassi ka fanda daalkar jhool gaye. Ye toh 10 saal pehle ki kahani thi, lekin ab main jee raha hoon. Mujhe paise ki kami se itni nafrat ho gayi ki maine soch liya tha—ek din main bhi posh ilake mein rahungaa, shaan ki zindagi jeeunga aur har us shaks ka munh band karungaa jisne gareebi ka taana dekar hamari zindagi ujaad di thi.

​12th December 2005

​"Tumhe pata hai na tumhe kya karna hai?" Ek shaks ne mujhse poocha.

​"Main is bakse ko paheunchana chahta hoon," maine kaha.

​"Dekh, tujhe abhi bahut bade-bade kaam karne hain. Isse ek choti si pareeksha samajh. Bandra East mein khade is aadmi ko ye suitcase de dena, woh tujhe iska inaam dega."

​"Lekin kya main ye kar paunga? Agar police ne pakad liya toh?"

​"Bharosa rakh. Dubai jaana hai, bada aadmi banna hai na? Tujhe abhi 50,000 rupees ki sakht zarurat hai. Teri maa hospital ke bed par aakhri saansein gin rahi hai. Bete hone ka farz nahi nibhaayega? Ab jaa, baaki baatein baad mein karenge."

​Maine us shaks se bag liya aur Dadar ki ek local train par sawaar ho gaya. Do-teen log mujhe ghoor rahe the, baaki logon ka dhyan idhar-udhar tha. Main train mein 75 lakh ke drugs leke chadhha tha. Usi bogie mein thik do seat door ek policewala baitha cigarette ke kash le raha tha. Uske nazar baar-baar mujhpar pad rahi thi, lekin main aise pretend kar raha tha jaise main ek masoom ladka hoon.
 
​Aap soch rahe honge ki main ye sab kyun kar raha tha? Wajah wahi thi—paisa! Main apne ghar mein maa aur chote bhai Frankey ke saath rehta tha. Asal mein main apni maa ki sagi santan nahi tha; unhone mujhe sadak se uthakar paala tha. Gonsalves family bahut acchi thi. Paalne wale ka haq paida karne wale se bada hota hai. Usi mamta ka karz aaj main ada karna chahta tha. Main bada ameer aadmi banna chahta tha. 
​Meri nazar baar-baar us policewale se takra rahi thi. Agle station par train aate hi bheed badhi aur main kone mein khada ho gaya. Bandra East aate hi main bheed se nikalkar ek kone mein khada hua aur suitcase check karne laga. Maine jeb se us aadmi ki tasveer nikali jiske paas mujhe jaana tha. Tabhi us policewale ko utarte dekh main dar gaya aur turant station se bahar nikal gaya. Main paseene se bheeg raha tha. 

​Sadak paar karte hi ek aadmi dikha jisne chashma lagaya tha aur kaan mein mobile tha. Usne mujhe paas aane ka ishara kiya. 

​"Maal le aaye?" usne poocha. 

​"Jaisa Bosco sir ne bataya tha, ye lijiye," maine suitcase badhaate hue kaha. 

​"Ek minute..." Usne dusre haath mein pakdi choti revolver mere pet par taan di. 

​"Sir? Kya aapko mujhpar vishwas nahi?" 
​"Hum bharose se zyada apne profession par dhyan dete hain," usne kaha. 

​Woh mujhe ek ped ke peeche le gaya, suitcase check kiya, drugs ki nasheeli packet ko súngha aur phir noton ka ek mota bundle meri taraf badha diya. Meri aankhon mein chamak aa gayi.
 
​"Tu imaandar mehsus hota hai. Tune bakhubi apna kaam kiya. Le, ye teri mehnat ka paisa." 

​"Sir, lekin mujhe Dubai jaana hai. Kya main aapke boss se nahi mil sakta?" 

Pehle usne oose bareeq nazaro se guzara, oose vichlit ja pakar usne kuch der teherkar socha fhir jaise uske tanghaal halat ko dekh jaise uske Kattar dil ke kisi kone mein rehem uthi

​"Huhhh, Rehte ho sadak par aur sapne dekhte ho haveli ke! Khair, sapne kaun nahi dekh sakta? Ye card le aur sun, ye baat kisi ko pata nahi chalni chahiye. Aaj ke baad na tu mujhe jaanta hai, na main tujhe." 

​Usne mujhe ek card diya jis par bas ek "H" ka nishaan bana tha. Woh chala gaya. Maine sadak se ek polythene uthayi, usmein paise rakhe aur ghar ki aur nikal pada. Aaj dil ka dar thoda kam hua tha. Maa ko hospital mein bharti karana tha. 

​CHAPTER 3

​"Frankey! Frankey! Main ghar aa gaya hoon!" Maine darwaja kholte hue kaha.
 
​"Haan bhai, aap aa gaye?" Frankey ne meri taraf dekha.
 
​"Chal, jaldi hospital chal. Operation ke liye doctor ko kehna hai," maine jooti waapis pehente hue kaha.
 
​"Bhai, itne paise kahan se laaye?" Frankey ne noton ki gaddi dekhkar hairan hote hue poocha.
 
​"Tera bhai jahan se bhi laaya, tujhe kya? Chal jaldi."
 
​"Bhai, sach-sach batao. Ek din mein itne paise arrange karna kitna mushkil hai. Aapne kuch galat toh..."
 
​"Dekh, mere dost Ajit se udhaar liye hain. Jab main Dubai jaunga na, toh paise return kar dunga. Ab maa ke paas chalna hai, jaldi kar." 

​Hospital peheunchkar doctor se baat hui. Shaam ko hi maa ka operation tay ho gaya. Maa ne dheere-dheere aankhein kholi. Frankey unke paas baithkar muskurata raha. 

​"Maa, chinta mat kar. Ab tera operation ho jayega. Bhaiya ne paison ka arrangement kar liya hai."
 
​"Kahan se paise laaya beta?" Maa ne dheemi awaaz mein poocha.
 
​"Maa, mera dost Ajit hai na, usi ne diye hain. Ab bas apni theek hone ke din gino." 

​"Tune koi bura kaam toh nahi kiya na?" 

​"Maa, kya tumhein apne bete par bharosa nahi hai? Frankey ki chinta mat kar, mera dost mujhe Dubai bhej dega. Phir dekhna hum kaise maala-maal honge."
 
​Maa ka muskurata chehra dekh main apne emotions control na kar saka aur cabin se bahar nikalkar rone laga. 

​Agley din main Dubai ka visa aur job paane ke liye ek agent ke daftar gaya. 

​"Dekhiye, aap 12th pass hain. Koi engineering ya accounting ki degree nahi hai. Agar aapko Dubai jaana hai, toh aapko 90,000 se 1 lakh rupees kharch karne honge, aur wahan kaam sirf waiter ya sweeper ka milega," agent ne saaf bol diya.
 
​Main chupchaap wahan se nikal gaya. Dil mein dukh tha ki main kam padha-likha hoon. Lekin tabhi mere phone ki ghanti baji. 

​"Hello, Asif Hussain bol rahe ho?" Ek gambhir aur kadak awaaz aayi. 

​"Haan, aap kaun?"

​"Sun, tune jo maal pass karaya tha, usse kaam ho gaya hai. Tujhe Dubai jaana hai na? Tera lucky number aa gaya hai. Tu Dubai peheunch, kaam main tujhe dunga. Bas passport ready rakh, visa main arrange karunga. Aur sun, kisi ko kuch mat batana." 

​"Bhai, main kyun bataunga! Bohot-bohot shukriya! Lekin kaam kya hoga?" 

​"Tu aam khaa, guthli mat gin. Tu bas Dubai aa, munh-maanga paisa milega. Kuch din mein visa process pura ho jayega, bas bag pack kar." 

​Phone cut ho gaya. Meri khushi ka thikana nahi raha. Main dabey paon waapis agency office gaya aur ticket ke liye apply kar diya. 
​!